ساعات الواحد بينسى

الواحد لما بيدخل فى دوامة الشغل ساعات بينسى حاجات كتير, مبدئيا أنا بنسى أيام الإسبوع :) وغير كل ده الواحد بيبقى تايه فى ظل كل هذا الوهم والمكياج الإعلامى الذى يوهم الأشخاص أن هدفك فى الحياة أن تقتنى وتجمع الألعاب ومن يجمع ألعاب أكثر من الأخر هو الكسبان..وأقصد هنا بالألعاب كل المقتنيات المادية.

 كيف أبكى على شىء قد ذهب ..ونفسى التى تملك كل شىء ذاهبه

أنا دائما بسأل نفسى “نفسك فى إيه”..والإجابة بتختلف من وقت لوقت على حسب حالاتى النفسية..المفروض الإجابة الصح تكون إنى أدخل الجنة وربنا يرضى عنى ويغفرلى ذنوبى.

ده إطار التفكير بالنسبة لى, أن يكونى هدفى واضح وهو دخول الجنة..للأسف فى بعض الأحيان تتهافت الدنيا  ويتم التعامى بقصد عن الهدف والواحد بيحس إنه عايش لدنيا زائفة ومغرور بيها.

أهلى عايزنى أتجوز بالعافية وأنا مش عايز أتجوز, وأهلى بردو كانو عايزنى أشتغل فى شغلانة تانية مرتبها أحسن لكن أنا قلت لهم أنا مش هشتغل فى حاجة إلا لما أكون بحبها عشان أقدر أبدع فيها مش عايز أبقى فقط ترس فى مكنة. والحمدلله لقيت إللى كنت أتمناه :)

ساعات من كتر ضغط أهلى فعلا بفكر فى الزواج من إنسانة محترمة لكن بفوق وبكتشف إن الزواج تقييد :) وزى ما أكون لازم أتزوج عشان يكون المجتمع راضى عنى, أنا مش شايف إن الزواج هدف هو بالنسبة لى غاية, هل قبل ما أتزوج كانت علاقتى مع ربنا أحسن,لو الإجابة نعم..يبقى ده معناه إن فى حاجة غلط.

وبردو عشان يكون المجتمع راضى عنى لازم أجمع فلوس كتير وخلاص.

الأهداف الواضحة

أنا عشان أريح نفسى كل شوية هحدد بعض الأهداف الواضحة إللى لازم أخلصها :)

1. أفهم دينى أكتر

2. أزيد من معلوماتى عن العلوم الفيزيائية وتاريخ الفلسفة حتى أستطيع أن أتناقش مع الملحدين

3. أن يكون هدفى وأنا بشتغل إنى أعمل تغيير إيجابى فى المجتمع من خلال عملى

4. أزيد من معلوماتى فى مجالى إللى بشتغل فيه وأن أشترى بعض الكتب

5. أن أساعد مجتمعى بأى طريقة خيرية سواء تبرعات أو مساعدات تطلب جهد

6. أن أحسن من نفسى من خلال التعلم من أخطائى

هى دى أهدافى اليومين دول وأنا بقترح على أى حد يقرأ المقالة إنه يحدد أهدافه عشان ميبقاش عايش تايه :)

الوقت بيفوت بسرعة..وياريت كل واحد يقول لى أهدافه إيه

شكرا :)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s