شهادتى على أحداث 20 نوفمبر فى التحرير

كل القنوات كانو قاعدين بيقولوا إن العدد قليل فى التحرير بس مفيش فيهم أى حد كان جايب تصوير للى بيحصل فى الميدان..كانوا قاعدين بس يقولوا فى ضرب فى شارع محمد.

المهم أنا رحت الميدان على الساعة 4:30 وإتصدمت لإن الميدان كان تقريبا مليان على الأخر ومكنش فى تواجد لأحزاب أو منصات والناس معظمها كانو بيهتفوا “مش هنمشى هو يمشى” و”يسقط يسقط حكم العسكر”.

والإحساس الأساسى فى الميدان إن الناس كلها متحدة على حاجة واحدة..مفيش تفرقة زى الأيام الأولى من الثورة.

أول لما تدخل الميدان هتحس بريحة خل حادة جدا وعينك هتوجعك وكل لما تقرب كل ما الريحة بتتركز أكتر..الريحة ديه طبعا من القنابل المسيلة للدموع..كمية القنابل الرهيبة ديه ماهى إلا تعبير عن قدرة الشرطة على ضبط النفس.

المهم الناس فى كل الأشكال والألوان بجميع فئات المجتمع وجميع الأعمار.

الأمن المركزى كان كله فى شارع محمد محمود لكن كل شوية الثوار بيقربوا أكتر وهو يتراجع وكل دقيقة أو دقيقتين تلاقى مصاب الناس شايلاه ورايحة بيه على المستشفى الميدانى.

المهم على الساعة 5 كدة قدرنا ننتصر على الأمن والناس فرحت كله قعد يصقف.

بعديها بدقيقتين لاقيت ناس كتير بتشاور على شارع القصر العينى وكله بيقول” إجمععععع”.

محدش فاهم إيه إللى بيحصل وكله جرى ناحية شارع العينى وأنا جريت معاهم .. المهم وأنا بجرى لقيت ولد عنده بتاع 13 أو 12 سنة متعور فى عينه وحاطط عليها قطن. بيقوللى “إلحق الجيش بيضرب فينا الجيش بيضرب فينا قالك الجيش حمى الثورة”.

بعديها بالضبط لقيت الناس كلها راجعا بتجرى زى الصاروخ ناحية الميدان وببص ورا لقيت كمية شرطة عسكرية غريبة !! أقسم بالله زى ميكونوا داخلين حرب ! وقاعدين بيضربوا فى المتظاهرين ضرب غشامة بالعصيان..أنا شفت المنظر ده و طلعت جريت برة الميدان.

أول لما طلعت سمعت بتاع عشر ضربات طلق نار..

هى ديه شهادتى .. أنا بعد إللى شفته النهاردة إكتشفت 100% إن طنطاوى ومجلسه ما هم إلا مجموعة من الخونة وكبرهم كان وزير الدفاع لمدة عشرين سنة عند المخلوع.

لم أعد أهتم أوأكترث بأى شئ يخص الإنتخابات..فإذا كان القائم على رأس الدولة لا يحترم أدمية المواطنين فلتحترق الإنتخابات !

كفرت بكل الأحزاب والإتجهات السياسة..كلكم منافقون

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s